النبا الآن معاك لحظة بلحظة
مقالات مشابهة
يوميات بيومي أفندي في زمن التيك توك
(الحلقة الثانية)
النجومية في خمس ثوان
——————————-
خرجت من البيت أتمشى وأشم شوية هواء… لقيت شاب واقف في نص الرصيف، وفاتح كاميرا الموبايل، وكل شوية يقول:
“استنى… ريأكشن مش مضبوط!”
وبعدين يعيد المشهد للمرة الخامسة والعشرين!
افتكرته بيصور فيلم عالمي، فسألته:
“يا ابني… بتعمل إيه؟”
قال لي وهو بيعدل شعره المسبسب:
“بصور فيديو خمس ثواني.”
قلت له:
“كل الهيصة دى علشان خمس ثواني؟!”
رد بثقة:
“يا عمو… الخمس ثواني دول ممكن يجيبوا مليون مشاهدة.”
قلت:
“والمليون مشاهدة هيجيبوا إيه؟”
قال:
“هيجيبوا إعلان… والإعلان تجيب فلوس.”
قلت:
“إحنا زمان كنا نقعد سنين في الجامعة علشان نحصل على وظيفة… وأنتم بقيتوا خمس ثواني تجيبوا ملايين!”
وبالصدفة لقيت واحد تاني بيجري في الشارع… افتكرته حرامي أو بيهرب من كلب!
قولتله على مهلك متصربع على ايه.
قالى بجري علشان ألحق أصور “الجولدن آور” !
قولتله ويطلع أيه الاور ده
ضحك على قلة فهمي وقال بشوف مشاهدات الفيديو من اول دقيقة عملت كام لايك.
وقفت أبص للسما وقلت:
“اللهم لا اعتراض…
ثم عدلت الطربوش، وزفرت زفرة طويلة وقلت:
“الله يرحم أيام زمان… كان الواحد يدور على لقمة العيش … دلوقتي بقى يدور على ليك وشير !
يوميات بيومي أفندي في زمن التيك توك
بقلم: الدكتور أسامة بيومي
